Fréttir

Einar Gíslason látinn

26.03.2015
Einar Gíslason kortagerðarmaður
Mynd: Kristjana Guðmundsdóttir
Einar Gíslason að störfum.

Einar Gíslason kortagerðarmaður er látinn, 91 árs að aldri. Hann lést á hjúkrunarheimilinu Skjóli 17. mars sl. og verður jarðsunginn frá Fossvogskirkju í Reykjavík mánudaginn 30. mars kl. 15.

Í hálfa öld var Einar Gíslason lykilmaður í gróðurkortagerð á Íslandi. Hann hóf störf hjá Atvinnudeild Háskólans árið 1949 og vann þar við jarðvegskortagerð til ársins 1955. Þá hófst kortlagning gróðurs á miðhálendi Íslands og tók Einar þátt í þeirri vinnu frá upphafi, lengst af hjá Rannsóknastofnun landbúnaðarins en síðasta áratuginn hjá Náttúrufræðistofnun Íslands. Einar var alla tíð afar vandvirkur við störf sín og gerði kröfur um nákvæm vinnubrögð.

Einar lauk störfum í október 2005, 81 árs að aldri, og var við það tækifæri sæmdur gullmerki Náttúrufræðistofnunar Íslands.