Fréttir

Hrafnaþing: Vatnajökulsþjóðgarður á krossgötum

26.11.2018
Dettifoss í Jökulsá á Fjöllum í Vatnajökulsþjóðgarði
Mynd: Magnús Guðmundsson

Dettifoss í Jökulsá á Fjöllum, Vatnajökulsþjóðgarði.

Hrafnaþing Náttúrufræðistofnunar Íslands verður haldið miðvikudaginn 28. nóvember kl. 15:15–16:00. Magnús Guðmundsson framkvæmdastjóri Vatnajökulsþjóðgarðs flytur erindið „Vatnajökulsþjóðgarður á krossgötum“.

Vatnajökulsþjóðgarður er tíu ára um þessa mundir og því má segja að hann hafi slitið barnsskónum og framundan séu unglingsárin. Þjóðgarðurinn, sem er einn sá stærsti í Evrópu, spannar tæp 14% af flatarmáli Íslands og nær yfir Vatnajökul og stór svæði í nágrenni hans, þar á meðal þjóðgarðana sem fyrir voru í Skaftafelli og Jökulsárgljúfrum.

Hjá Vatnajökulsþjóðgarði starfa um 25 starfsmenn á heilsárgrundvelli og við þann hóp bætast nokkrir tugir landvarða og annarra starfsmanna á álagstímum. Starfsmennirnir hafa það að meginmarkmiði að gestir Vatnajökulsþjóðgarðs geti notið jákvæðrar upplifunar í náttúru Íslands og fái góða þjónustu á stóru og fjölbreytilegu svæði. Auk þess hafa þeir það meginhlutverk að standa vörð um náttúruna og að fræða gesti og gangandi. Þetta er ögrandi verkefni í þjóðgarði sem nær bæði yfir víðáttumikil og torfær svæði sem og fjölsótta ferðamannastaði. Á árinu 2017 sótti um ein milljón gesta þjóðgarðinn heim og hefur fjöldi þeirra vaxið mjög hratt frá því Vatnajökulsþjóðgarður var stofnaður árið 2008.

Framundan eru spennandi tímar hjá Vatnajökulsþjóðgarði og hjá öllum sem unna íslenskri náttúru, meðal annars vegna þess að sú ríkisstjórn sem nú er við stjórnvölin hefur sett sér metnaðarfull markmið á sviði náttúruverndar.