Fréttir

Aldurshlutföll rjúpu á veiðitíma 2007

18.12.2007

Náttúrufræðistofnun hvetur rjúpnaskyttur til að klippa annan vænginn af rjúpum sem þeir veiða og senda stofnuninni. Af vængjunum má ráða hvort um er að ræða fugl á fyrsta ári eða eldri fugl. Fuglum af sama veiðisvæði eða úr sömu sveit þarf að halda saman í poka þannig að hægt sé að sundurgreina sýnin eftir landshlutum. Lítið hefur skilað sér af vængjum enn sem komið er. Náttúrufræðistofnun skorar á veiðimenn að taka þátt í þessu verkefni og styðja þannig við bakið á rjúpnarannsóknum.

Niðurstöður aldursgreininganna eru birtar hér á vef NÍ en þær verða meðal annars notaðar við mat á stofnstærð rjúpunnar í landinu.

Fyrstu niðurstöður frá veiðitíma 2007:

Landshluti

Fullo

Ungar

Samtals

% ungar

Suðvesturland

2

1

3

33%

Vesturland

31

76

107

71%

Vestfirðir

14

34

48

71%

Norðvesturland

33

75

108

69%

Norðausturland

72

225

297

76%

Austurland

7

18

25

72%

Suðurland

21

58

79

73%

Samtals

180

487

667

73%

Ath: skipting landsins er sú sama og hjá veiðistjórnunarsviði UST (sjá http://www.ust.is/Veidistjornun/Almennt/Veidisvaedi/ ) nema hvað Suðvesturland er hér tekið sér en með Vesturlandi hjá UST.

Samtals er búið að aldursgreina 667 fugla. Hlutfall ungfugla af heildinni er 73% or er þetta lágt hlutfall unga, líkt og hefur einkennt fækkunarár áður. Hlutföll eru einnig mjög jöfn á milli landshluta ólíkt því sem var í fyrra. Árlega er stefnt að því að aldursgreina 4−500 fugla úr hverjum landshluta. Mikið vantar því uppá fullt sýni en nú dregur að þeim tíma að veiðimenn gera að afla sínum og því mikilvægt að nota tækifærið og minna á verkefnið.

 

Sendið vængina til NÍ
Sérfræðingar Náttúrufræðistofnunar hafa um áratuga skeið rannsakað aldurshlutföll í rjúpnaafla. Á lit flugfjaðra rjúpunnar er hægt að greina á milli tveggja aldurshópa, fugla á fyrsta ári og eldri fugla. Þessi gögn eru m.a. notuð til að reikna út heildarstofnstærð rjúpunnar í landinu. Veiðimenn, sem tilbúnir eru að taka þátt í þessari könnun, eru beðnir um að klippa annan vænginn af öllum þeim rjúpum sem þeir fella. Fuglum af sama veiðisvæði eða úr sömu sveit ber að halda sér í poka þannig að hægt sé að sundurgreina sýnin eftir landshlutum.

Vængina á að senda til

Náttúrufræðistofnun Íslands
Pósthólf 5320
125 Reykjavík

Stofnunin mun greiða sendingarkostnað sé þess óskað. Menn eru beðnir um að láta nafn sitt og heimilisfang fylgja með sýnum þannig að hægt sé að senda þeim, sem það vilja, niðurstöður greininga úr þeirra sýni og heildarniðurstöðurnar í lokin.

Flugfjaðrir á fyrsta árs fugli. Ljósm. Erling Ólafsson.

Litur flugfjaðra segir til um aldur
Til að aldursgreina rjúpur bera menn saman lit á flugfjöður nr. 2 og flugfjöður nr. 3 (talið utan frá). Fjaðurstafurinn sjálfur er alltaf dökkur hjá íslenskum rjúpum óháð aldri, en við erum að bera saman litinn á föninni sjálfri, ekki fjaðurstafnum. Hjá fuglum á 1. ári er flugfjöður nr. 2 dekkri en nr. 3 eins og hér sést. Ef smellt er á myndina hér til hægri, sést samanburðurinn. Hjá fullorðnum fuglum, fuglum á 2. ári og eldri, eru fjaðrir nr. 2 og 3 jafndökkar eða nr. 3 dekkri. Hjá sumum fullorðnum fuglum eru engin litarefni í fönum flugfjaðra nr. 2 og 3.